مطبخ (رودي) مع الأكلات الليبية.

رئيسة التحرير فبراير 2, 2022 أناقة وأذواق, المطبخ, غير مصنف Leave a comment 835 Views

الرشدة

تعتبر (الرشدة أو الرشتة) أكلة ليبية من الوجبات الشعبية الشتوية اللذيذة، المفضلة في الشتاء، لأنها غنية بالبقوليات، وفيثامين (C)، من خلال الفلفل الأخضر، وعصر الليمون، وهي تعد وجبة متكملة مع اللحم المقدد وفيها كمية من السعرات الحرارية العالية والطاقة.

مقادير المرقة …….

زيت، دهان القديد، قطع من قديد، بصل، طماطم مجفف وبصل جاف، فلفل أخضر، فلفل احمر، كركم، ملح، طماطم معجون، عدس، حلبة (حسب الرغبة)، حمص، وممكن إضافة بازيلاء، قطع صغيرة من الجزر ، فلفل مدخن، ثوم، حبق، شبت، بهارات.

طريقة المرقة:

نضع زيت ف الطنجرة وبصل مفروم وقديد ولا عصبان يابس وشحمه اذا كان قديدك جاف ديري شوي زيت ونخليهم يغلو مع بعض وبعدين نضيف طماطمة مبشوره علي حسب الرغبة وشوية ملح لان القديد مالح ما اضيفي ملح ونضيف حمص وعدس وحلبة وقطع فلفل احمر واخضر وطماطم معجون(حكة) وكركم وفلفل احمر ونضيف بصل مقدد وطماطم مقدد.

ونخليها شوية تقلي ع النار ونضيف شوية مية وبعدين انعدللها ميتها.

مقادير العجينة.

دقيق وملح ومية، تنعجن وتكون يابسة شوية وبعدين تقطع دوائر وتخلوها ترتاح شوية وبعدين تفردوها بالدقيق وتلف وتقطع وتغربل من الدقيق ونصبها في المرقة.

ونجهز خلطة مكونة من تومة و معاهم قرن فلفل حار وشبت وحرارات وقرفة وفلفل أسود مهروسات وممكن اضافة ملعقة فلفل مجروش مدخن ونضيفهم ع الرشتة وهيا ع النار تعطيه بنه و تنقصو عليها النار لين اطيب و صحتين و عافيه ❤وتكون نويشطة وفايحة مع ليمون الف صحة.

طريقة تجفيف البصل.

خودي بصل قشريه واغسليه وقطعيه جوانح وديرله كمية من الملح لاباس بيها وحطيه في صفرة في الشمس وكل مرة حركية متسهيش عليه لين يذبل وييبس ويولي لونه اشقر بعدين احتفظي بيه في الفريز واستخدميه وقت (رشدة البرمة) وبالنسبة للطماطم نفسه.

يغسل الطماطم وقسميه بين زوز وحطي انفاص الطماطم في صفرة وكل نص حطي فوقه كمية من الملح وخليه في الشمس من ثلاثة الي اربع ايام ونفس الشي احتفظي بيه في الفريز.

الفلفل الأخضر الحار نفسه بعد ايولي لونه أحمر تغسليه وتجفيفيه وتفتحيه بين زوز وتنحي منه الزريعه وتنشريه في الشمس يوم لين ايروب وبعدها ترحيه مرتين.

سلاطة شتوية

خس، وجرجير، وخيار، وطماطم، وزيتون مشكل، وقطع جبن، وعين الجمل(لوز اخزايني)، وليمون، وملح، وزيت.

تقطع السلاطة متوسطة، وتقطع الخضار قطع صغيره وتخلط مع بعض وتزين بالجبن واوراق النعناع الطازجة ونوع من المكسرات كاجو او عين الجمل.

عصير الرمان

اوراق نعناع، رمان، ماء، قطع ليمون.

تقطع شرائح متوسطة وتوضع في فورمات الثلج وبعدها اوراق النعناع وبعدها ملعقة من الرمان وبعدها مية.

نخليها في الفريز لغاية ماتتجمد وبعدها توضع ف اكوب مع عصير الرمان ومشروب غازي وممكن اضافه قطرات من موخيتو الرمان المركز ويزين بشرائح ليمون واوراق النعناع.

ويقدم